Nyuma y’iminsi 10 batorezwa mu kigo cy’Ubutore cya Nkumba giherereye mu karere ka Burera mu ntara y’Amajyaruguru, abayobozi 420 b’amashuri ya TVET basoje itorero Indemyabigwi 2023.

Iri torero ryatangiye kuwa 1-10/11/2023, ryateguwe n’Urwego rw’igihugu rushinzwe Tekiniki, Imyuga n’Ubumenyingiro (RTB) ku bufatanye na Minisiteri y’Ubumwe bw’Abanyarwanda n’Inshingano Mboneragihugu.

Ubwo ryatangizwaga, Umuyobozi Mukuru wa RTB, Paul UMUKUNZI, yavuze ko ryateguwe mu rwego rwo kongera kubibutsa Indangagaciro na kirazira z’umuco Nyarwanda.

Yagize ati “TVET mu Rwanda ifite inshingano zikomeye zirimo gutanga ubumenyingiro butanga ibisubizo by’ibibazo u Rwanda rufite, bityo rero kugira ngo uyu musanzu utangwe neza, dukeneye kubikorana ubutore bushimangirwa n’ubunyarwanda.”

Ibi kandi byanashimangiwe n’Umunyamabanga wa Leta muri Minisiteri y’Uburezi, Claudette Irere mu muhango wo gusoza iri torero, aho yasabye aba bayobozi kuzerekana ko ari Indemyabigwi koko barema ababyiruka  bafite imyitwarire iboneye, bagendera kure ingeso mbi kandi basobanukiwe neza icyo u Rwanda rubifuzaho.

Iri torero ryitabiriwe n’abayobozi b’amashuri ya Leta, Ayigenga n’anafashwa na Leta mu buryo bw’amasezerano, mu mihigo bahize hakaba harimo gukomeza kunga ubumwe, kurwanya ingengabitekerezo ya Jenoside, kunoza ireme ry'uburezi, kongera umubare w'abanyeshuri bitabira kwiga TVET no gukomeza guteza imbere umuco wo guhanga udushya no kwigira.